गौण खनिज साठवणूक आणि ‘सीलिंग’ जमिनीवरील बांधकामाची चौकशी थंडावली!
जनतेमध्ये प्रश्नचिन्ह; महसूल विभागाच्या कारवाईवर नाराजी
कोरपना: कोरपना तालुक्यातील मौजा चनई खुर्द (चनई खु.) येथील गट क्रमांक 8/1 आणि 8/2 मध्ये मोठ्या प्रमाणावर गौण खनिजाची (मुरुम, दगड, वाळू) साठवणूक केल्याप्रकरणी आणि ‘सीलिंग’ कायद्यांतर्गत मिळालेल्या जमिनीवर अनधिकृतपणे जिनिंगचे बांधकाम झाल्याच्या गंभीर आरोपांची चौकशी महसूल विभागाने थंड्या बस्त्यात टाकल्याचे समोर आले आहे.
कारवाईचे आदेश, मात्र अंमलबजावणी शून्य: अर्जदारांनी केलेल्या तक्रारीनुसार, या जागेवर मोठ्या प्रमाणात गौण खनिज साठवले गेले असून, याबाबत चौकशी करून दोषींवर फौजदारी कारवाई करण्याचे आदेश वरिष्ठ कार्यालयाने दिले होते. त्यानुसार, मौजा चनई खु. येथील स.नं. 8/1 व 8/2 या जमिनीतील गौण खनिज साठ्याची चौकशी करून तात्काळ अहवाल सादर करण्यास सांगण्यात आले होते.
परंतु, आदेशाला महिना उलटूनही स्थानिक महसूल विभागाने कोणतीही ठोस कारवाई केलेली नाही किंवा चौकशी अहवाल सादर केलेला नाही. या inaction मुळे नागरिकांमध्ये तीव्र नाराजी पसरली आहे.
’सीलिंग’ जमिनीवर जिनिंगचे बांधकाम कसे झाले?: या प्रकरणातील सर्वात गंभीर बाब म्हणजे सदर जमीन ही ‘सीलिंग’ (शेतजमीन कमाल धारणा) कायद्यांतर्गत मिळालेली आहे. नियमांनुसार, ‘सीलिंग’ जमिनीचा वापर शेतीव्यतिरिक्त करण्यासाठी ‘अकृषिक’ (NA) परवाना घेणे बंधनकारक असते.
परंतु, ‘एनए’ नसतानाही याच जमिनीवर एवढ्या मोठ्या जिनिंग (कापूस प्रक्रिया) इमारतीचे बांधकाम झालेच कसे? हा प्रश्न निर्माण झाला आहे.
जनतेची मागणी: महसूल विभागाने तातडीने चौकशी अहवाल सादर करून गौण खनिज साठवणूक आणि ‘सीलिंग’ जमिनीवर झालेल्या अनधिकृत बांधकामाबाबत कायद्यानुसार कठोर फौजदारी कारवाई करावी.
