कोरपणा हादरला! खेळणाऱ्या चिमुकल्यावर मोकाट कुत्र्यांचा जीवघेणा हल्ला; शरीराचे लचके तोडले; नागरिकांमध्ये संतापाची लाट!
कोरपणा/मोहब्बत खान ✍️✍️✍️
शहरात मोकाट कुत्र्यांची दहशत आता सर्व सीमा ओलांडून विकोपाला गेली असून, नागरिकांच्या आणि विशेषतः निष्पाप बालकांच्या सुरक्षेचा प्रश्न ऐरणीवर आला आहे. ११ ऑक्टोबर २०२६ रोजी कोरपण्यात एक अत्यंत संतापजनक आणि मन हेलावून टाकणारी घटना घडली. खेळत असलेल्या एका निष्पाप चिमुकल्यावर मोकाट कुत्र्यांच्या टोळीने अचानक जीवघेणा हल्ला चढवला. या क्रूर हल्ल्यात कुत्र्यांनी त्या बालकाचे लचके तोडले असून, अंगावर आणि पाठीवर गंभीर व खोल जखमा झाल्या आहेत. या रक्तरंजित घटनेमुळे कोरपणा शहरात एकच खळबळ उडाली असून पालकांमध्ये तीव्र भीती आणि दहशतीचे वातावरण पसरले आहे.
जखमा इतक्या गंभीर की चंद्रपूरला हलवावे लागले!
चिमुकल्यावर झालेल्या या हल्ल्यातील चावा आणि जखमा इतक्या गंभीर व भयंकर होत्या की, येथील स्थानिक उपचाराने पुरवले नाही. प्राथमिक उपचारानंतर तातडीने कोरपणा ग्रामीण रुग्णालयातून त्या चिमुकल्याला पुढील उपचारासाठी चंद्रपूर येथे हलवण्यात आले. सध्या तो बालक मृत्यूशी झुंज देत असून, त्याच्या कुटुंबावर दुःखाचा डोंगर कोसळला आहे.
जुनीच पुनरावृत्ती, पण प्रशासन अजूनही ‘कुंभकर्णी झोपेत’!
शहरात मोकाट कुत्र्यांनी लहान बालकांना आणि नागरिकांना लक्ष्य करण्याची ही पहिलीच वेळ नाही. याआधीदेखील अशा अनेक संतापजनक आणि जीवघेण्या घटना घडल्या आहेत. अनेक बालकांना या कुत्र्यांनी गंभीरपणे लचके तोडल्याचे वारंवार समोर आले असून यावर अनेकदा वृत्तपत्रांमध्ये बातम्याही झळकल्या आहेत. मात्र, असे असतानाही नगरपंचायत प्रशासनाला याचे साधे गांभीर्य आलेले नाही.
शहरातील मुख्य रस्ते, गल्ल्या आणि वस्त्यांमध्ये मोकाट कुत्र्यांनी अक्षरशः थैमान घातले आहे. लहान मुले, वृद्ध आणि महिलांना घराबाहेर पडणे आता जीवघेणे ठरू लागले आहे. नागरिकांकडून वारंवार तक्रारी आणि निवेदने देऊनही प्रशासन कागदी घोडे नाचवण्यात व्यस्त आहे. प्रशासनाचा हा ढिसाळ, निगरगट्ट आणि डोळेझाकपणाचा कारभारच आज निष्पाप बालकांना या मुक्या जनावरांच्या क्रूरतेचा बळी ठरवत आहे.
प्रशासनाला नेमकी किती बळींची प्रतीक्षा? संतप्त सवाल
“नगरपंचायत प्रशासन या घटनेची नेमकी किती बळींची वाट पाहत आहे?”
असा संतप्त आणि बोचरा सवाल आता कोरपणातील त्रस्त नागरिक उपस्थित करत आहेत. प्रशासनाच्या या अकार्यक्षमतेमुळे नागरिकांमध्ये प्रचंड संताप उसळला आहे.
तीव्र आंदोलनाचा सज्जड दम!
जर लवकरात लवकर मोकाट कुत्र्यांचा बंदोबस्त करून या जीवघेण्या समस्येकडे गांभीर्याने लक्ष दिले गेले नाही, तर नगरपंचायतीच्या विरोधात तीव्र स्वरूपाचे जनआंदोलन छेडण्यात येईल, असा सज्जड दम संतप्त नागरिकांनी व पालकांनी दिला आहे. आता प्रशासनाला नेमकी कधी जाग येणार आणि आमच्या लेकरांचे रक्षण कधी होणार, याकडे संपूर्ण कोरपणा शहराचे डोळे लागले आहेत.
