आर.टी.ई. (RTE) २५% मोफत प्रवेश प्रक्रियेला सुरुवात; १० मार्चपर्यंत अर्ज करण्याची संधी!
कोरपना पंचायत समितीचे आवाहन: आर.टी.ई. अर्जासाठी ‘गुगल लोकेशन’ तपासूनच फॉर्म भरा.
कोरपना: शैक्षणिक वर्ष २०२६-२७ साठी आर.टी.ई. (RTE) २५% अंतर्गत ऑनलाईन प्रवेश प्रक्रियेला सुरुवात झाली आहे. या प्रक्रियेत पारदर्शकता राहावी आणि पालकांची गैरसोय टाळावी यासाठी गटशिक्षणाधिकारी, पंचायत समिती कोरपना यांनी पालकांसाठी महत्त्वाची नियमावली जाहीर केली आहे.
अर्ज भरताना घ्यावयाची खबरदारी: पालकांनी अर्ज भरताना आपल्या निवासाचा पूर्ण पत्ता आणि Google Location (Latitude-Longitude) पुन्हा पुन्हा तपासून पाहावे. चुकीच्या लोकेशनमुळे पाल्याला जवळच्या शाळा मिळण्यात अडचण येऊ शकते. अर्जात जन्मदाखल्यावरीलच जन्मतारीख नोंदवावी, कारण एकदा भरलेली जन्मतारीख पुन्हा बदलता येणार नाही.
महत्वाचे बदल आणि नियम: निवासी पुरावा: यावर्षी निवासी पुरावा म्हणून गॅस बुक ग्राह्य धरले जाणार नाही. बँक पासबुक द्यायचे असल्यास ते केवळ राष्ट्रीयकृत बँकेचेच असावे.
शाळांचे अंतर: यावर्षी केवळ १ किमी अंतरापर्यंतच्या शाळा निवडीसाठी उपलब्ध होतील.
एकच अर्ज भरा: एकाच पाल्याचे दोन अर्ज (Duplicate) भरल्यास दोन्ही अर्ज बाद होतील. अर्ज चुकला असल्यास जुना अर्ज ‘डिलीट’ करूनच नवीन अर्ज भरावा.
दिव्यांग बालके: ४०% किंवा त्यापेक्षा जास्त दिव्यांगत्व असल्याचे प्रमाणपत्र आवश्यक आहे. जन्मतारखेबाबत तांत्रिक अडचण आल्यास rtemah2020@gmail.com वर त्वरित ईमेल करावा.
अंतिम मुदत आणि तांत्रिक अडथळे: ऑनलाईन अर्ज भरण्याची अंतिम मुदत १० मार्च २०२६ पर्यंत आहे. सर्व्हरवर ताण आल्यास पोर्टल स्लो होऊ शकते, अशा वेळी पालकांनी घाबरून न जाता काही वेळाने पुन्हा प्रयत्न करावा. अर्ज भरल्यानंतर अर्जाची प्रत, अर्ज क्रमांक आणि पासवर्ड सुरक्षित ठेवावा, असे आवाहन प्रशासनातर्फे करण्यात आले आहे.
”पालकांनी घाई न करता सर्व कागदपत्रांची पूर्तता करूनच अर्ज सबमिट करावा. खोटी माहिती आढळल्यास मिळालेला प्रवेश रद्द होऊ शकतो, याची नोंद घ्यावी.”
— गटशिक्षणाधिकारी, पंचायत समिती कोरपना
