नारंडा परिसरात अवैध दारूचा महापूर; राज्य उत्पादन शुल्क विभाग ‘गाढ’ झोपेत?
गावातील शांतता धोक्यात; तळीरामांच्या उच्छादामुळे नागरिक संतप्त, कारवाईची मागणी
नारंडा/कोरपना :तालुक्यातील नारंडा येथे गेल्या काही दिवसांपासून अवैध देशी व विदेशी दारूची मोठ्या प्रमाणात विक्री सुरू आहे. या अवैध व्यवसायाने संपूर्ण गावात उच्छाद मांडला असून, तरुण पिढी व्यसनाधीनतेच्या उंबरठ्यावर उभी आहे. मात्र, या गंभीर प्रकाराकडे राज्य उत्पादन शुल्क विभागाचे अक्षम्य दुर्लक्ष होत असल्याने, हा विभाग नक्की ‘गाढ झोपेत’ आहे की काय? असा संतप्त सवाल आता नागरिक विचारत आहेत.
नारंडा गावातील काही विशिष्ट अड्ड्यांवरून दिवसाढवळ्या दारूची विक्री केली जाते. छुप्या मार्गाने होणारी ही वाहतूक आता सर्रासपणे सुरू झाली आहे. मुख्य रस्ते आणि वस्त्यांच्या कोपऱ्यावर मद्यपींचा वावर वाढल्याने माता-भगिनींना रस्त्यावरून चालणे कठीण झाले आहे. सायंकाळच्या सुमारास तर या भागात तळीरामांचा मोठा राबता असतो, ज्यामुळे वादाचे आणि भांडणाचे प्रसंग वारंवार घडत आहेत.
उत्पादन शुल्क विभागाची भूमिका संशयास्पद? अवैध दारू विक्रीवर नियंत्रण मिळवण्याची जबाबदारी असलेल्या राज्य उत्पादन शुल्क विभागाला या विक्रीची कुणकुण कशी लागत नाही, याबाबत आश्चर्य व्यक्त होत आहे. “वरचेवर होणारी ही विक्री विभागाच्या आशिर्वादाने तर सुरू नाही ना?” अशी शंका आता ग्रामस्थ व्यक्त करत आहेत. तक्रार करूनही ठोस कारवाई होत नसल्याने प्रशासनाच्या कार्यक्षमतेवर प्रश्नचिन्ह उभे राहिले आहे.
नागरिकांचा इशारा: गावातील वाढती गुन्हेगारी आणि बिघडत चाललेले सामाजिक स्वास्थ्य पाहता, तात्काळ या अवैध दारू अड्ड्यांवर धाड टाकून ते कायमचे बंद करण्यात यावे, अशी मागणी होत आहे.
”गावात दारूमुळे अनेकांचे संसार उद्ध्वस्त होत आहेत. तरुणाईला व्यसनापासून वाचवण्यासाठी प्रशासनाने कठोर पावले उचलणे गरजेचे आहे. जर येत्या काही दिवसांत कारवाई झाली नाही, तर तीव्र आंदोलन छेडण्यात येईल.”— एक त्रस्त ग्रामस्थ, नारंडा
आता या प्रकरणी वरिष्ठ अधिकारी दखल घेऊन कुंभकर्णी झोपेत असलेल्या स्थानिक पथकाला जागे करतात का, याकडे सर्वांचे लक्ष लागले आहे.
