चंद्रपूरच्या जिल्हाधिकारी पदी वसुमना पंत; विनय गौडा यांची छत्रपती संभाजीनगरला बदली
चंद्रपूर/मुंबई: राज्यातील सनदी अधिकाऱ्यांच्या आज (२ एप्रिल) मोठ्या प्रमाणावर बदल्या करण्यात आल्या असून, चंद्रपूरचे जिल्हाधिकारी श्री. विनय गौडा जी.सी. (IAS) यांची बदली करण्यात आली आहे. त्यांच्या जागी नागपूर महानगरपालिकेच्या अतिरिक्त आयुक्त श्रीमती वसुमना पंत (IAS) यांची चंद्रपूरच्या नव्या जिल्हाधिकारी म्हणून नियुक्ती करण्यात आली आहे.
प्रशासकीय फेरबदल
सामान्य प्रशासन विभागाने जारी केलेल्या आदेशानुसार, विनय गौडा यांची नियुक्ती आता जिल्हाधिकारी, छत्रपती संभाजीनगर या पदावर करण्यात आली आहे. विशेष म्हणजे, छत्रपती संभाजीनगरचे सध्याचे जिल्हाधिकारी श्री. दिलीप स्वामी यांच्या जागी हे पद ‘कनिष्ठ प्रशासकीय श्रेणीत’ अवनत (Downgrade) करून ही नियुक्ती करण्यात आली आहे.
तात्काळ कार्यभार सोपवण्याचे आदेश
मंत्रालयातील सहसचिव सुभाष उमराणीकर यांच्या स्वाक्षरीने निघालेल्या या पत्रात श्री. विनय गौडा यांना आपला सध्याचा कार्यभार नवनियुक्त जिल्हाधिकारी श्रीमती वसुमना पंत यांच्याकडे सोपवून, छत्रपती संभाजीनगरचा कार्यभार तात्काळ स्वीकारण्याच्या सूचना देण्यात आल्या आहेत.
महत्त्वाच्या अटी आणि सूचना:
बदलीच्या या प्रक्रियेत शासनाने काही कडक निर्देशही दिले आहेत:
Sopremo प्रणाली: बदली झालेल्या अधिकाऱ्यांनी रुजू अहवाल ‘सुप्रिमो’ (Sopremo) प्रणालीवर अपडेट करणे अनिवार्य आहे.
गोपनीय अहवाल: नवीन पदस्थापनेवर जाण्यापूर्वी पूर्वीच्या पदावरील संबंधित अधिकाऱ्यांचे गोपनीय अहवाल (CR) विहित वेळेत पूर्ण करण्याचे आदेश देण्यात आले आहेत.
ई-ऑफिस: नवीन ठिकाणी पदभार स्वीकारल्यानंतर ई-ऑफिस आणि HRMS प्रणालीच्या वापरावर विशेष लक्ष देण्याच्या सूचनाही शासनाने दिल्या आहेत.
या बदल्यांमुळे जिल्ह्याच्या प्रशासकीय वर्तुळात मोठी चर्चा सुरू झाली असून, नवनियुक्त जिल्हाधिकारी श्रीमती वसुमना पंत या लवकरच चंद्रपूरचा पदभार स्वीकारतील असे संकेत मिळत आहेत.
