सावध राहा, सुरक्षित राहा! ‘डिजिटल अरेस्ट’च्या भ्रामक जाळ्यात अजिबात अडकू नका – महाराष्ट्र सायबर पोलिसांचा नागरिकांना सज्जड इशारा
कोरपना:
सध्या देशभरात सायबर भामट्यांनी नागरिकांना लुटण्यासाठी एक नवीन आणि अत्यंत चलाख मार्ग शोधून काढला आहे. पोलीस, सीबीआय (CBI) किंवा सर्वोच्च न्यायालयाचे अधिकारी असल्याचे भासवून व्हिडिओ कॉलद्वारे नागरिकांना ‘डिजिटल अरेस्ट’ (Digital Arrest) करण्याची भीती दाखवली जात आहे. मात्र, कोणतीही तपास यंत्रणा किंवा पोलीस कधीही व्हिडिओ कॉलद्वारे कोणालाही अटक करत नाहीत किंवा पैशांची मागणी करत नाहीत, असे स्पष्ट निर्देश महाराष्ट्र शासनाच्या ‘महाराष्ट्र सायबर’ विभागातर्फे देण्यात आले आहेत.
कसा चालतो सायबर गुन्हेगारांचा खेळ?
व्हायरल झालेल्या जनजागृती संदेशात दाखवल्याप्रमाणे, सायबर ठग लोकांना फोन करून मनी लाँड्रिंग किंवा इतर गंभीर गुन्ह्यांमध्ये अडकल्याची भीती दाखवतात. त्यानंतर आरोपी बनावट कागदपत्रे आणि सर्वोच्च न्यायालयाचे आदेश असल्याचे भासवून व्हॉट्सॲप किंवा इतर माध्यमांवर व्हिडिओ कॉल करतात. नागरिकांना इतके घाबरवले जाते की, ते मानसिक दबावाखाली येऊन स्वतःच्या बँक खात्यांची गोपनीय माहिती किंवा पैसे समाजकंटकांच्या स्वाधीन करतात.
‘महाराष्ट्र सायबर’चा मोलाचा सल्ला: घाबरू नका, डोके चालवा!
जर तुम्हाला असा कोणताही संशयास्पद व्हिडिओ कॉल किंवा धमकीचा फोन आला, तर अजिबात घाबरू नका. कोणतीही रक्कम पाठवू नका. लक्षात ठेवा, कायद्यात ‘डिजिटल अरेस्ट’ अशी कोणतीही तरतूद अस्तित्वात नाही. अशा भामट्यांना वेळीच ओळखून मूर्ख बनू नका आणि प्रसंगावधान राखून सतर्क राहा.
फसवणूक झाल्यास त्वरित संपर्क साधा:
सायबर गुन्ह्यांपासून स्वतःचे संरक्षण करण्यासाठी आणि कोणत्याही सायबर गुन्ह्याची तक्रार नोंदवण्यासाठी खालील माध्यमांचा वापर करा:
👉 हेल्पलाइन क्रमांक: १९३० (1930) वर त्वरित संपर्क साधा.
👉 अधिकृत संकेतस्थळ: www.cybercrime.gov.in किंवा www.mhcyber.gov.in वर ऑनलाइन तक्रार नोंदवा.
”सावध राहू, फसानार नाही! हम बेवकूफ नहीं बनेंगे” हा नारा डोळ्यांसमोर ठेवून नागरिकांनी सायबर गुन्हेगारांपासून सावध राहण्याचे आवाहन महाराष्ट्र शासन आणि महाराष्ट्र सायबर पोलिसांकडून करण्यात आले आहे.
