’नागरिकांच्या जीवाशी खेळणाऱ्या उद्योगांवर कठोर कारवाई करणार’; चंद्रपूरसाठी पंकजा मुंडे यांचा ‘ॲक्शन प्लॅन’
शेतकऱ्यांचा कापूस काळा पडला, नुकसान भरपाई मिळणारच; चंद्रपुरात पंकजा मुंडे ॲक्शन मोडमध्ये.
चंद्रपूर: “चंद्रपूर हा औद्योगिक जिल्हा असला तरी उद्योगांना नियमांचे उल्लंघन करून नागरिकांच्या जीवाशी खेळण्याचा अधिकार नाही. प्रदूषणाची समस्या मार्गी लावण्यासाठी चंद्रपूरचा एक वर्षाचा, तीन वर्षाचा आणि दीर्घकालीन असा विशेष ‘प्रदूषण मुक्ती प्लॅन’ तयार करण्यात येईल,” अशी ग्वाही राज्याच्या पर्यावरण व वातावरणीय बदल मंत्री पंकजा मुंडे यांनी दिली.
आमदार सुधीर मुनगंटीवार यांनी विधानसभेत उपस्थित केलेल्या प्रश्नाची दखल घेत, पंकजा मुंडे यांनी गुरुवारी चंद्रपूर जिल्ह्यातील विविध प्रदूषणग्रस्त भागांची प्रत्यक्ष पाहणी केली.
मंत्री पंकजा मुंडे यांनी दुर्गापूर येथील चंद्रपूर औष्णिक विद्युत केंद्राचा (CSTPS) कन्व्हेअर बेल्ट, बेलसणी येथील महामाया कोल वॉशरीज आणि घुग्घुस येथील विदर्भ मिनरल एनर्जी कंपनीला भेट दिली. यावेळी त्यांनी प्रदूषणाची भीषणता पाहून संताप व्यक्त केला.
”उद्योगांनी फॉगर, फॉगिंग मशिन आणि प्रदूषण रोखणारी यंत्रणा तात्काळ बसवावी. जे अधिकारी किंवा कंपन्या नियमांचे पालन करणार नाहीत, त्यांच्यावर पर्यावरण मंत्री म्हणून अंकुश कसा ठेवायचा हे मला चांगलेच ठाऊक आहे.”
— पंकजा मुंडे, पर्यावरण मंत्री
शेतकऱ्यांना मिळणार नुकसान भरपाई
प्रदूषणामुळे केवळ मानवी आरोग्यच नाही, तर शेतीचेही मोठे नुकसान होत आहे. परिसरातील शेतकऱ्यांचा कापूस प्रदूषणाने काळा पडत असल्याची बाब समोर आली आहे. यावर भाष्य करताना मंत्र्यांनी स्पष्ट केले की, बाधित शेतकऱ्यांना कंपन्यांकडून नुकसान भरपाई मिळवून दिली जाईल.
जिल्हास्तरीय समिती: प्रदूषणावर लक्ष ठेवण्यासाठी लवकरच एक जिल्हास्तरीय समिती स्थापन करण्यात येणार आहे.
आरोग्य प्राधान्य: प्रदूषणाने होणाऱ्या आजारांमुळे नागरिकांचे आरोग्य धोक्यात आले असून, त्याला प्राधान्य दिले जाईल.
आमदार सुधीर मुनगंटीवार यांची मागणी: “प्रदूषणामुळे नागरिकांना विविध आजार होत आहेत. नियमांच्या चौकटीत राहून कंपन्यांनी आपली जबाबदारी पार पाडावी आणि झालेल्या नुकसानाची भरपाई द्यावी,” अशी मागणी त्यांनी यावेळी केली.
या पाहणी दौऱ्यात जिल्हाधिकारी वसुमना पंत, मुख्य कार्यकारी अधिकारी पुलकित सिंह, उपविभागीय अधिकारी विशाल कुमार मेश्राम आणि महाराष्ट्र प्रदूषण नियंत्रण बोर्डाचे अधिकारी उपस्थित होते.
