बिबीत विज्ञान कुंभ! ६९ बालवैज्ञानिकांच्या प्रतिकृतींनी वेधले लक्ष; तालुकास्तरीय विज्ञान प्रदर्शनी उत्साहात संपन्न
नांदा फाटा / कोरपना:
विद्यार्थ्यांमध्ये वैज्ञानिक दृष्टिकोन, संशोधनवृत्ती आणि सर्जनशीलतेला नवी दिशा देणाऱ्या ५४ व्या तालुकास्तरीय विज्ञान प्रदर्शनीने बिबी येथील एकलव्य इंग्लिश स्कूल तथा ज्युनिअर कॉलेजमध्ये अक्षरशः विज्ञानाचा जल्लोष अनुभवाला आला. पंचायत समिती, कोरपना यांच्या वतीने आयोजित या शानदार प्रदर्शनीत प्राथमिक व माध्यमिक विभागातील तब्बल ६९ आकर्षक विज्ञान प्रतिकृतींचे सादरीकरण करण्यात आले. बालवैज्ञानिकांच्या या कल्पकतेने उपस्थितांची मने जिंकली.
मान्यवरांच्या उपस्थितीत दिमाखदार उद्घाटन व बक्षीस वितरण
गटविकास अधिकारी श्रीकांत बोबडे यांच्या हस्ते या प्रदर्शनीचे दणक्यात उद्घाटन करण्यात आले, तर गटशिक्षणाधिकारी माधव चिंतमवाड यांनी अध्यक्षस्थान भूषवले. यावेळी शिक्षण विस्तार अधिकारी कल्याण जोगदंड, लोकनाथ खंडारे यांच्यासह विविध शाळांचे मुख्याध्यापक, शिक्षक व विद्यार्थ्यांची मोठी उपस्थिती होती.
कार्यक्रमाच्या उत्तरार्धात पार पडलेल्या बक्षीस वितरण सोहळ्याचे अध्यक्षस्थान विस्तार अधिकारी कल्याण जोगदंड यांनी भूषवले, तर एकलव्य इंग्लिश स्कूल तथा ज्युनिअर कॉलेजचे संस्थापक प्रा. आशिष देरकर प्रमुख पाहुणे म्हणून उपस्थित होते.
स्पर्धेतील विजेते मानकरी:
बालवैज्ञानिक प्रदर्शन (प्राथमिक – गैरआदिवासी गट): प्रथमेश प्रशांत धाबेकर (प्रथम), अनुश्री अनिल वांढरे (द्वितीय), एकांश रामटेके (तृतीय).
बालवैज्ञानिक प्रदर्शन (माध्यमिक – गैरआदिवासी गट): जिज्ञासा देवाळकर (प्रथम), यशवंत काळे (द्वितीय), गौरी खडसे (तृतीय).
विशेष गट (प्राथमिक): अन्वया कैलास कुचणकर (आदिवासी गट, प्रथम), यश मोरेश्वर पेंदोर (दिव्यांग गट, प्रथम).
विशेष गट (माध्यमिक): आशिष नारायण हिवरकर (आदिवासी गट, प्रथम), सुजल राजेंद्र देरकर (दिव्यांग गट, प्रथम).
शिक्षक व परिचर स्पर्धा: वैशाली पद्मानंद तुम्मे (प्राथमिक शिक्षक), प्रा. कृतिका काकडे (माध्यमिक शिक्षक), आणि सुदाम लांडे (प्रयोगशाळा परिचर) यांनी प्रथम क्रमांक पटकावला.
निबंध व वादविवाद स्पर्धा: रियांशी ठाकरे, त्रिशा देशमुख, भावेश रनदिवे आणि गौरी खडसे यांनी आपापल्या गटात उत्कृष्ट यश संपादन केले.
या दिमाखदार कार्यक्रमाचे प्रास्ताविक कल्याण जोगदंड यांनी केले, सूत्रसंचालन विकास भंडारवार यांनी तर आभार विठ्ठल टोंगे यांनी मानले. प्रदर्शनीच्या यशस्वी आयोजनासाठी पंचायत समितीचे अधिकारी, एकलव्य विद्यालय परिवार आणि शिक्षक-शिक्षकेतर कर्मचाऱ्यांनी विशेष परिश्रम घेतले.
