तहसीलदार मॅडम इलेक्शन ड्युटीवर, नागरिकांचे काम एक महिन्यापासून रखडले!
कोरपना: स्थानिक स्वराज्य संस्था निवडणुकीच्या कामांमुळे कोरपना येथील तहसील कार्यालयातील तहसीलदार या गेली महिनाभर पूर्णवेळ निवडणूक ड्युटीवर असल्यामुळे सामान्य नागरिकांची अनेक महत्त्वाची कामे खोळंबली आहेत.
मागील एक महिन्यापासून नागरिकांना सातत्याने तहसील कार्यालयाचे उंबरठे झिजवावे लागत आहेत, मात्र दाखले, जमिनीचे व्यवहार, फेरफार नोंदी आणि संजय गांधी/श्रावणबाळ योजना यांसारख्या अत्यावश्यक कामांना गती मिळत नसल्याने नागरिकांमध्ये तीव्र नाराजी पसरली आहे.
😥 नागरिकांची व्यथा: शेतकरी, विद्यार्थी आणि वयोवृद्ध नागरिक विशेषतः त्रस्त आहेत. एका वृद्ध नागरिकाने आपले नाव न सांगण्याच्या अटीवर सांगितले की, “माझ्या पेन्शन योजनेसाठी श्रावणबाळ कागदपत्रांवर सही आवश्यक आहे, पण तहसीलदार मॅडम इलेक्शन ड्युटीवर असल्याने काम होत नाही. एक महिन्यापासून हेलपाटे मारतोय.”
पर्यायी व्यवस्था कधी? निवडणूक ड्युटीमुळे दैनंदिन कामात होणारा विलंब लक्षात घेऊन तात्पुरती पर्यायी व्यवस्था करण्याची मागणी नागरिक करत आहेत. “एवढ्या मोठ्या कालावधीसाठी तहसीलदार गैरहजर असतील तर किमान नायब तहसीलदारांना किंवा इतर सक्षम अधिकाऱ्यांना नागरिकांच्या कामासाठी अधिकृत अधिकार (Delegation of Powers) द्यायला हवेत,” अशी मागणी सामाजिक कार्यकर्त्यांनी केली आहे.
या गंभीर विषयाकडे जिल्हाधिकाऱ्यांनी तातडीने लक्ष देऊन नागरिकांच्या रखडलेल्या कामांसाठी लवकरात लवकर पर्यायी यंत्रणा उपलब्ध करावी, अशी अपेक्षा व्यक्त होत आहे.
