राजुराचा कायापालट! नक्षलग्रस्त भागाच्या विकासासाठी २.४२ कोटींचा निधी मंजूर; आमदार देवराव भोंगळे यांच्या पाठपुराव्याला यश
राजुरा: राजुरा विधानसभा मतदारसंघातील दुर्गम आणि तेलंगणा सीमेला लागून असलेल्या नक्षलग्रस्त गावांच्या नशिबाचे टाळे आता उघडणार आहेत. या भागातील प्रलंबित विकासकामांसाठी राज्य शासनाकडून २ कोटी ४२ लक्ष रुपयांचा भरीव निधी मंजूर झाला आहे. आमदार देवराव भोंगळे यांनी शासनदरबारी केलेल्या सातत्यपूर्ण पाठपुराव्याला हे मोठे यश मिळाले असून, यामुळे सीमावर्ती भागातील गावांच्या विकासाला मोठी गती मिळणार आहे.
राजुरा मतदारसंघातील जिवती, कोरपना, गोंडपिपरी आणि राजुरा तालुक्यातील अनेक गावे डोंगराळ व नक्षलग्रस्त भागात येतात. भौगोलिक अडथळ्यांमुळे या भागात विकासाची गंगा पोहोचण्यास अडचणी येत होत्या. मात्र, आमदार भोंगळे यांनी पदभार स्वीकारल्यापासून या गावांमधील पायाभूत सुविधांवर विशेष भर दिला आहे.
या मंजूर निधीचा विनियोग प्रामुख्याने खालील कामांसाठी केला जाणार आहे:
रस्ते: विविध गाव-गुड्यांमधील अंतर्गत रस्त्यांचे काँक्रिटीकरण, सांडपाण्यासाठी पक्क्या नाल्यांचे बांधकाम, पिण्याच्या पाण्यासाठी यंत्रणांचे बळकटीकरण, गावातील मूलभूत सोयीसुविधांचा विस्तार.
”नक्षलग्रस्त भागातील नागरिकांना मुख्य प्रवाहाशी जोडण्यासाठी रस्ते, वीज आणि पाणी यांसारख्या मूलभूत गरजांची पूर्तता करणे ही माझी प्राथमिकता आहे. हा निधी केवळ सुरुवात असून, मतदारसंघातील शेवटच्या टोकापर्यंत विकास पोहोचवण्यासाठी मी कटिबद्ध आहे.”
— देवराव भोंगळे, आमदार, राजुरा विधानसभा
अनेक वर्षांपासून प्रलंबित असलेली कामे आता मार्गी लागणार असल्याने या भागातील नागरिकांमध्ये समाधानाचे वातावरण असून, स्थानिक कार्यकर्त्यांनी या निर्णयाचे स्वागत केले आहे.
