सावधान! चंद्रपूर जिल्ह्याला ‘ऑरेंज अलर्ट’; वादळी वाऱ्यासह गारपीटीचा इशारा
चंद्रपूर : हवामान बदलाचा मोठा फटका चंद्रपूर जिल्ह्याला बसण्याची शक्यता असून, नागपूर प्रादेशिक हवामान केंद्राने जिल्ह्यासाठी कडक इशारा जारी केला आहे. आगामी १ ते ३ एप्रिल दरम्यान जिल्ह्यावर निसर्गाचा कोप होण्याची शक्यता असल्याने जिल्हाधिकारी विनय गौडा यांनी नागरिकांना सतर्क राहण्याचे आवाहन केले आहे.
👉 १ व ३ एप्रिल: ‘येलो अलर्ट’ (विजांच्या कडकडाटासह पाऊस)
👉 २ एप्रिल: ‘ऑरेंज अलर्ट’ (मुसळधार पाऊस आणि गारपीटीची शक्यता)
या काळात ताशी ४० ते ५० किमी वेगाने सोसाट्याचा वारा सुटण्याची आणि काही भागात भीषण गारपीट होण्याची शक्यता वर्तवण्यात आली आहे.
जिल्हाधिकाऱ्यांनी नागरिकांच्या सुरक्षिततेसाठी खालील खबरदारी घेण्याचे निर्देश दिले आहेत:
सुरक्षित आसरा घ्या: मुसळधार पाऊस आणि वादळाच्या वेळी घराबाहेर पडणे टाळा. खिडक्या आणि दरवाजांपासून दूर राहा.
झाडांपासून सावध: वीज कडाडत असताना मोठ्या झाडांखाली, लोखंडी खांबां जवळ किंवा तात्पुरत्या शेडमध्ये आश्रय घेऊ नका.
विद्युत उपकरणे: घरात असताना इलेक्ट्रॉनिक वस्तूंचा वापर टाळा आणि शक्य असल्यास प्लग काढून ठेवा.
प्रवास टाळा: पावसामुळे दृश्यमानता कमी होत असल्याने वाहन चालवणे टाळा. सखल भाग आणि ड्रेनेज परिसरापासून दूर राहा.
महाकाली यात्रेकरूंसाठी विशेष आवाहन
सध्या चंद्रपुरात महाकाली देवीची यात्रा सुरू आहे. राज्याच्या कानाकोपऱ्यातून येणाऱ्या भाविकांची संख्या मोठी आहे. या पार्श्वभूमीवर जिल्हाधिकाऱ्यांनी विशेष सूचना दिल्या आहेत:
”यात्रेसाठी आलेल्या भाविकांनी हवामानाचा अंदाज घेऊनच आपली पुढची पावले उचलावीत. मुसळधार पावसाच्या स्थितीत सुरक्षित निवारा शोधण्यासाठी मंदिर परिसरातील नियंत्रण कक्षाशी (Control Room) संपर्क साधावा आणि प्रशासनाने दिलेल्या सूचनांचे काटेकोर पालन करावे.”
सतर्क राहा, सुरक्षित राहा! प्रशासनाने दिलेले हे आवाहन केवळ सूचना नसून आपल्या जिवाच्या सुरक्षिततेसाठी घेतलेला निर्णय आहे. अनावश्यक बाहेर पडणे टाळून सहकार्य करा.
